बाँके ।धारा नेपालगन्ज म्याराथनको १० औं संस्करणको पूर्वसन्ध्यामा नेपाल युवा उद्यमी मञ्च, नेपालगन्ज च्याप्टरले नेपालगन्ज कनक्लेवमा महत्वपूर्ण साझेदारी गर्ने निर्णय गरेको छ। यो साझेदारीले म्याराथनलाई थप प्रभावकारी र उत्सवमय बनाउने लक्ष्य राखेको छ। ‘दशौंमा दश इभेन्ट’ अन्तर्गत हुने कनक्लेवलाई हरेक वर्ष संयुक्त रूपमा आयोजना गर्ने सहमति भएको छ, जसमा नेपालगन्ज म्याराथनका संस्थापक अध्यक्ष टीएस ठकुरी र युवा उद्यमी मञ्चका अध्यक्ष तीर्थ थापाले सम्झौता पत्रमा हस्ताक्षर गरेका छन्।

सम्झौतापछि मञ्चका अध्यक्ष तीर्थ थापाले मञ्चको साझेदारीले सम्पूर्ण युवा उद्यमीहरूमा उत्साह थप्ने विश्वास व्यक्त गर्निभयो। उहाँले भन्नुभयो, “देशकै प्रतिष्ठित धारा नेपालगन्ज म्याराथन र यसको भगिनी इभेन्ट नेपालगन्ज कनक्लेवमा साझेदारी गर्न पाउँदा हामी सबै उत्साहित भएका छौं। प्रायोजन खोज्नेदेखि खर्च व्यवस्थापनसम्म हाम्रो समान जिम्मेवारी हुनेछ।” थापाले युवाहरूलाई समाजप्रति जिम्मेवारीबोध गराउन र केही नयाँ सिक्न यो प्लेटफर्म महत्त्वपूर्ण हुने बताएका छन्।

सम्झौता हस्ताक्षर कार्यक्रममा टीएस ठकुरीले सकारात्मक दिशा दिन युवा उद्यमीसँगको सहकार्यले थप ऊर्जा दिएको बताउनुभयो। “हाम्रो गाउँ, हाम्रो ठाउँ हामी आफैं बनाउनु पर्छ, देश बनाउने जिम्मा पनि हामीले नै लिनुपर्छ,” ठकुरीले भने। उहाँले साझेदारी र सहकार्यबाटै देशको विकास र समृद्धिको मार्गमा अघि बढ्न सकिने धारणा व्यक्त गर्नुभयो।

मञ्चका निवर्तमान अध्यक्ष एवं नेपालगन्ज मेडिकल कलेजका निर्देशक डा. नितेश कनोडियाले कनक्लेवसँगको साझेदारी आफ्नै कार्यकालमा सुरु भएको स्मरण गर्दै, यस कार्यक्रमलाई निरन्तरता दिन पाउँदा खुशी व्यक्त गर्नुभयो। “म मञ्चको निरन्तर सहभागितामा विश्वस्त छु, यद्यपि यसको समग्र नेतृत्व नेपालगन्ज म्याराथनले नै लिनुपर्छ,” कनोडियाले भन्नुभयो।

मञ्चका वरिष्ठ उपाध्यक्ष डा. ओम मिश्रले कनक्लेवको निरन्तरता र प्रभावकारितामा आफू विश्वस्त रहेको बताउनु भएको छ। कार्यक्रममा मञ्चका अर्का उपाध्यक्ष इन्जिनियर अरसद सिद्धिकी, म्याराथनका आउटरिच म्यानेजर चाहना शाह र आइटी कन्सल्ट्यान्ट भानु रेग्मीको उपस्थिति थियो।

नेपालगन्ज म्याराथनको आयोजक क्रियटिभ ह्याण्ड्सले कनक्लेव डाइरेक्टर र मञ्चले डेपुटी डाइरेक्टर नियुक्त गर्ने निर्णय गरेको छ। छिट्टै पत्रकार भेटघाटमार्फत कनक्लेवबारे विस्तृत जानकारी गराइने सहमति भएको छ। नेपालगन्ज कनक्लेव आगामी मंसिर २० र २१ गते आयोजना हुनेछ, जसमा आठ सेसनमा बहस र छलफल हुने बताइएको छ।

नेपालगन्ज म्याराथन, जुन देशकै छैटौं पुरानो सहर नेपालगन्ज र उदीयमान सहर कोहलपुरलाई जोड्ने महत्त्वपूर्ण खेलकुद कार्यक्रम हो, एम्सको प्रमाणीकरण रुटमार्फत सञ्चालन हुनेछ। म्याराथनको व्यवस्थापन क्रियटिभ गन्ज मिडिया एण्ड इभेन्ट म्यानेजमेन्टले गर्ने छ।