८, माघ २०८१

बाँके ।नेपालगन्ज उपमहानगरपालिका वडा नम्बर २१ का स्थानीय युवा अरबी खाँको हत्या प्रकरणमा दोषीलाई उन्मुक्ति दिएको भन्दै स्थानीयहरूले विरोध प्रदर्शन गरेका छन्। २०८० चैत १८ गते भएको हत्याका दोषीहरूलाई प्रहरीले पक्राउ गरे पनि कारबाही प्रक्रिया अगाडि नबढाएको भन्दै आक्रोशित स्थानीयवासीले नेपालगन्जको धबोझी चोकमा चक्काजाम गरेका हुन्।

हत्याको १० महिना बितिसक्दा पनि दोषीलाई कारबाही नगरिएको र प्रहरीले पैसा र पावरको दबाबमा आएर अन्याय गरिरहेको पीडित परिवारको आरोप छ। प्रदर्शनकारीहरूले “हत्या अपराधलाई उन्मुक्ति दिने प्रहरीको भूमिकाको भण्डाफोर गर” र “अरबी खाँका हत्यारालाई कारबाही गर” जस्ता नाराबाजी गर्दै यातायात अवरुद्ध पारेका छन् ।

पीडित परिवारका सदस्यहरूले हत्यामा संलग्न दोषीलाई पक्राउ गरेर न्याय दिलाउन प्रहरी प्रशासनमा पटकपटक आग्रह गरे पनि कुनै ठोस कदम चालिएको छैन। उनीहरूले प्रहरीमाथि निष्पक्षताको अभाव भएको आरोप लगाउँदै दोषीलाई कानुनी दायरामा ल्याउन जोड दिएका छन्। प्रदर्शनमा सहभागीहरूले पीडित परिवारको दुःखलाई राज्यले वेवास्ता गरेको भन्दै न्यायको लागि थप कडा कदम चाल्ने चेतावनीसमेत दिएका छन्।

यस घटनाले स्थानीयस्तरमा कानून कार्यान्वयनको कमजोर पक्ष उजागर गरेको छ। दोषीमाथि तत्काल कारबाही गरी पीडित परिवारलाई न्याय दिलाउन माग राख्दै प्रदर्शनकारीहरूले सरकारलाई कडा कदम चाल्न अनुरोध गरेका छन्। पीडित परिवारको आवाजलाई बेवास्ता गर्न नहुने र दोषीलाई कानुनी सजाय दिएर अन्यायमा परेको परिवारलाई न्याय दिलाउनुपर्ने उनीहरूको जोड छ।