६, चैत्र २०८१

बाँके ।बाँके जिल्लामा सवारी साधन चोरी र भारतीय गाडीहरूको चरम दुरुपयोगको विषयमा स्वतन्त्र युवा समूहले जिल्ला प्रशासन कार्यालयमा ज्ञापनपत्र बुझाउँदा प्रमुख जिल्ला अधिकारी (प्रजिअ) धर्मराज जोशीले चासो नदिएको भन्दै पत्रकार आशिष मल्लले आलोचना गरेका थिए। यही विषयलाई लिएर उनलाई प्रहरीले पक्राउ गरेको छ, जसको विभिन्न संघसंस्थाले विरोध जनाइरहेका छन्।

अनलाइन पत्रकार संघ, बाँके शाखाले सामाजिक सञ्जालमार्फत पत्रकारमाथि हस्तक्षेपको विरोध गर्दै मल्ललाई तत्काल रिहा गर्न माग गरेको छ। संघले “समाचार लेखेको वा नागरिकको आवाज उठाएको निहुँमा पत्रकारमाथि हस्तक्षेप बन्द होस्” भन्दै आफ्नो धारणा सार्वजनिक गरेको छ।

स्वतन्त्र युवा समूहका कपिल शाहका अनुसार, मल्लले “अहिलेका प्रजिअ जनताको लागि होइन, जनप्रतिनिधिको लागि आएका हुन्” भन्ने अभिव्यक्ति दिएका कारण उनलाई पक्राउ गरिएको हो। शाहले भने, “हिजोको छलफलपछि प्रशासनले मोटरसाइकल भेटिएको जानकारी दिएर बोलाए। म एक्लै जान सक्दिनँ भनेर पत्रकार मल्ललाई सङ्गै लान खोज्दा प्रहरीले एक्कासी मोबाइल खोसेर उनलाई पक्राउ गर्‍यो।”

पत्रकार मल्लले आफूलाई स्वतन्त्र रूपमा विचार राखेकै कारण प्रहरीले पक्राउ गरेको बताएका छन्। प्रशासनले जनताको सेवा र सुरक्षामा ध्यान दिनुको सट्टा न्यायका लागि लडिरहेका सञ्चारकर्मीलाई पक्राउ गर्नु निन्दनीय भएको स्वतन्त्र युवा समूहले जनाएको छ।

पत्रकार तथा अभिव्यक्तिको स्वतन्त्रतामाथि भएको यो हस्तक्षेप तत्काल रोक्न माग गर्दै विभिन्न पक्षहरूले मल्लको रिहाइका लागि दबाब दिन थालेका छन्।