बाँके ।लुम्बिनी प्रदेशमा मातृ तथा शिशु मृत्युदर घटाउन बाँके, पाल्पा र अर्घाखाँची जिल्लामा मोबाइल प्रविधिको प्रयोग गरी पारिवारिक स्वास्थ्य विवरण संकलन अभियान सुरु गरिएको छ। स्वास्थ्यकर्मीहरूमार्फत प्रत्यक्ष रूपमा घरधुरीमै पुगेर स्वास्थ्य विवरण संकलन गर्ने यस अभियानको शुभारम्भ लुम्बिनी प्रदेशका स्वास्थ्यमन्त्री खेमबहादुर सारुले पाल्पाबाट गर्नुभएको छ।

मन्त्री सारुले गर्भावस्था (गर्भदेखि सुत्केरी भएको ४२ दिनसम्म) तथा दुई वर्ष मुनिका बालबालिकाहरूको समयमै पहिचान गरी स्वास्थ्य तथा पोषण अवस्था सुधार्ने उद्देश्यका साथ यो कार्यक्रम सञ्चालन गरिएको बताउनुभयो। लुम्बिनी प्रदेशमा मातृ तथा शिशु मृत्युदर उच्च रहेकाले प्रदेश सरकारले प्राथमिकताका साथ यो कार्यक्रम अगाडि सारेको हो।

प्रदेशका तीन जिल्लामा महिला, बालबालिका तथा किशोरीको स्वास्थ्य सुधार गर्न विशेष अनुदान कार्यक्रमसमेत सञ्चालन गरिनेछ। पाल्पाका ६५ हजार, अर्घाखाँचीका ४८ हजार र बाँकेका ९४ हजार घरधुरीमा स्वास्थ्यकर्मी परिचालन गरी परिवारको स्वास्थ्य विवरण तयार गरिने छ।

स्वास्थ्य सेवा विस्तार गर्न र नियमित अनुगमन गर्न प्रदेशभरि स्वास्थ्यकर्मी परिचालन गरिने लुम्बिनी स्वास्थ्य निर्देशनालयका निमित्त निर्देशक रोशनलाल चौधरीले जानकारी दिनुभयो। कमजोर स्वास्थ्य सूचकांक भएका यी जिल्लाहरूमा गर्भवती महिलादेखि नवजात शिशुहरूलाई आवश्यक पोषण, खोप र स्वास्थ्य सेवा सुनिश्चित गर्न अभियान प्रभावकारी हुने अपेक्षा गरिएको छ।