१७, मंसिर २०८१

बाँके ।राप्तीसोनारीको बैजापुरमा रिपोर्टिङ गर्न गएका पत्रकार आशिष् मल्ल ठकुरीमाथि गुण्डा नाइके संजय राणाद्वारा प्रहरीकै अगाडि हातपात गरिएको छ। घटनाको क्रममा मल्लको क्यामेरा समेत जफत गरिएको छ। पत्रकार मल्लले घटनाबारे जानकारी दिँदै सुरक्षा निकायले घटनास्थलमा उपस्थित भएर पनि हस्तक्षेप नगरेको आरोप लगाएका छन्।

प्रहरी प्रशासनकै अगाडि यस्तो आक्रमण हुनु प्रेस स्वतन्त्रतामाथि गम्भीर चुनौतीका रूपमा देखिएको छ। मल्लले भनेका छन्, “रिपोर्टिङका क्रममा प्रहरीकै अगाडि मेरो क्यामेरा खोसियो र मलाई हातपात गरियो। पत्रकारको सुरक्षा सुनिश्चित गर्ने जिम्मेवारी भएको प्रहरी निकायले तमासे मात्र बनेर हेर्दै रह्यो।”

घटनाप्रति विभिन्न पत्रकार संगठन र प्रेस स्वतन्त्रता पक्षधरहरूले गम्भीर आपत्ति जनाएका छन्। उनीहरूले पत्रकारमाथि गरिएको आक्रमणको भर्त्सना गर्दै दोषीलाई कडा कारबाहीको माग गरेका छन्। प्रेस स्वतन्त्रताका लागि लड्दै आएका संघसंस्थाहरूले यस घटनालाई राज्यको निष्क्रियता र प्रेस स्वतन्त्रतामाथि गरिएको आक्रमणका रूपमा व्याख्या गरेका छन्।

पत्रकारमाथिको आक्रमण र क्यामेरा जफतजस्तो घटनाले लोकतन्त्रको मूल आधारमा चोट पुर्‍याएको छ। दोषीलाई अविलम्ब कानूनी कठघरामा ल्याउन माग गर्दै पीडित पत्रकारले न्यायका लागि सम्बन्धित निकायमा न्यायको माग गरेका छन्।