२१, फाल्गुन २०८१
बाँके ।बर्दियाको गुलरिया नगरपालिका–१२ स्थित भवानी सामुदायिक वनमा एक भाले पाटे बाघ मृत अवस्थामा फेला परेको छ। बाघ केही साता अगाडि मरेको अनुमान गरिएको डिभिजन वन कार्यालय बर्दियाका सूचना अधिकारी रामकुमार चौधरीले जानकारी दिनुभयो।

उहाँका अनुसार, बाघको शरीर कुहिएको अवस्थामा भेटिएको छ, जसका कारण पोस्टमार्टम गर्न कठिन भएको छ। बाघ करिब ३ वर्षको रहेको राष्ट्रिय प्रकृति संरक्षण कोषका प्रमुख अजीत तुम्बाहाङ्फेले बताउनुभयो। उहाँले बाघ लामो समयसम्म खान नपाएर मरेको हुनसक्ने आशंका व्यक्त गर्नुभयो।

स्थानीय सामुदायिक वनका उपभोक्ता र डिभिजन वन कार्यालयका कर्मचारीले वन गस्ती गर्ने क्रममा तीव्र दुर्गन्ध आएपछि खोजबिन गर्दा बाघ मृत फेला परेको थियो। वन तथा संरक्षण अधिकारीहरूले घटनाको विस्तृत अनुसन्धान भइरहेको जनाएका छन्।