बाँके ।बाँके डिभिजन वन कार्यालयले बहुमूल्य मानिएको श्रीखण्ड प्रजातिको बिरुवा निःशुल्क वितरण गर्ने भएको छ। कार्यालयका सिनियर डिभिजन वन अधिकृत शंकरप्रसाद गुप्ताका अनुसार आगामी वर्ष १८,००० श्रीखण्डका बिरुवा निःशुल्क बाँड्ने तयारी गरिएको छ।

डिभिजन वन कार्यालय बाँकेले आयोजना गरेको पत्रकार अन्तरक्रिया तथा अवलोकन भ्रमणका क्रममा अधिकृत गुप्ताले श्रीखण्डको व्यावसायिक महत्वका बारेमा जानकारी गराउँदै यसको संरक्षण र प्रवर्द्धनका लागि सामुदायिक तथा निजी वनमा रोपणलाई प्राथमिकता दिने बताउनुभएको छ। एक किलोको तीन हजारभन्दा बढी मूल्य पर्ने श्रीखण्डको खेतीले दीर्घकालीन रूपमा राम्रो आम्दानी गर्न सकिने भएकाले किसान तथा वन उपभोक्ताहरूलाई यसको खेतीमा प्रोत्साहित गरिनेछ।

वन अधिकृत गुप्ताले श्रीखण्डका बिरुवा राष्ट्रिय वनमा रोप्न कठिन हुने बताउनुभयो। उहाँका अनुसार सामुदायिक तथा निजी वनमा रोप्दा उचित स्याहार र व्यवस्थापन गर्न सकिने भएकाले यस्ता क्षेत्रमा बिरुवा वितरण गरिनेछ। विशेषज्ञहरूका अनुसार श्रीखण्डको रुख पूर्ण रूपमा हुर्किन करिब २० वर्ष लाग्ने र त्यसपछि यसको काठ तथा अन्य भागबाट आकर्षक आम्दानी गर्न सकिन्छ।

कार्यक्रमका क्रममा अधिकृत गुप्ताले चक्ला वन, सामुदायिक वन तथा धार्मिक वनको अवस्था र वन व्यवस्थापनका विभिन्न रणनीतिबारे पनि जानकारी गराउनुभएको थियो। वन संरक्षण तथा व्यवस्थापनमा आधारित योजनाहरू अघि बढाउँदै समुदायलाई प्रत्यक्ष लाभ दिने लक्ष्य रहेको उहाँले बताउनुभयो।

डिभिजन वन कार्यालयले आगामी वर्षदेखि श्रीखण्डसहित अन्य उपयोगी बिरुवाहरू पनि वितरण गर्ने योजना बनाएको छ। यसले वन तथा वातावरण संरक्षणमा महत्वपूर्ण योगदान पुर्याउने र स्थानीयवासीलाई आर्थिक रूपमा सक्षम बनाउने विश्वास गरिएको छ।