११, चैत्र २०८१
बाँके ।बाँकेका प्रमुख जिल्ला अधिकारी (सिडिओ) धर्मराज जोशी पदबहाली गरेको तीन साता नपुग्दै विवादमा तानिएका छन्। केही दिनअघि सार्वजनिक कार्यक्रममा जनप्रतिनिधिलाई ‘ड्राइभर म खलासी’ भन्दै दिएको अभिव्यक्तिले आलोचना खेपिरहेका जोशीले हालै बिना आधार पत्रकार आशिष मल्ललाई पक्राउ गराएको आरोप लागेको छ।

नेपालगन्जका सञ्चारकर्मी तथा एबिपी क्राइम मिडियाका सञ्चालक आशिष मल्ललाई सिडिओ जोशीको निर्देशनमा बाँके प्रहरीले पक्राउ गरेको छ। यस घटनालाई लिएर स्थानीयवासी, मल्लका आफन्त, र विभिन्न नागरिक समाजका अगुवाहरूले ‘यस्ता सिडिओ चाहिँदैन’ जस्ता नारासहित प्रशासन कार्यालय अगाडि विरोध प्रदर्शन गरिरहेका छन्।

स्थानीयहरूले सिडिओ जोशीमाथि अधिकारको दुरुपयोग गर्दै पत्रकारमाथि अनावश्यक रूपमा दमन गरेको आरोप लगाएका छन्। आशिष मल्लले सधैं अन्यायविरुद्ध आवाज उठाउँदै आएका कारण नियोजित रूपमा पक्राउ गरिएको उनीहरूको दाबी छ।

यता, पत्रकार महासंघ भने यस विषयमा मौन रहेको देखिएको छ। मल्लका समर्थकहरूले यदि तत्काल बिना शर्त रिहाइ नगरिए थप कडा आन्दोलन गर्ने चेतावनी दिएका छन्।

बाँकेमा प्रमुख जिल्ला अधिकारीहरू विवादमा तानिने क्रम नयाँ होइन। पछिल्लो समय मात्रै पनि चार/पाँच जना सिडिओहरू विभिन्न विवादका कारण आलोचनाको सामना गर्दै अन्यत्र सरुवा भएका थिए। जोशीको पछिल्लो व्यवहारले बाँकेमा पुनः प्रशासनिक अस्थिरता निम्त्याएको देखिन्छ।

नागरिकहरूको चर्को दबाब र निरन्तर विरोधका बीच सिडिओ जोशीले यस घटनाबारे कसरी प्रतिक्रिया दिनेछन् भन्ने कुरामा सबैको ध्यान केन्द्रित छ।