२१, चैत्र २०८१
बाँके ।बाँकेमा प्रथम शिखा जिल्ला स्तरीय पौडी प्रतियोगिता आयोजना हुने भएको छ। शिखा एकेडेमी कोहलपुरको आयोजना तथा नेपालगञ्ज पौडी क्लबको समन्वयमा हुने यो प्रतियोगिताबारे बुधबार नेपालगञ्जमा आयोजित पत्रकार सम्मेलनमार्फत जानकारी गराइएको छ।

प्रतियोगिता यही चैत २३ गते शनिबार शिखा एकेडेमीको आफ्नै पौडी पोखरीमा आयोजना हुनेछ। आयोजकका अनुसार जिल्लाका १५ विद्यालयका ६५ जना विद्यार्थीहरूले प्रतिस्पर्धा गर्नेछन्। सहभागीमध्ये १७ जना महिला र ४८ जना पुरुष खेलाडी छन्। आयोजक शिखा एकेडेमीका अतिरिक्त क्रियाकलाप प्रमुख सूर्यमणि अधिकारीका अनुसार काठमाडौँ बाहिर पहिलो पटक यस्तो प्रतियोगिता हुन लागेको हो।

प्रतियोगितामा ८ देखि १७ वर्ष उमेर समूहका विद्यार्थीहरूले भाग लिनेछन्। पौडी खेलको विकास गर्ने उद्देश्यका साथ शिखा एकेडेमीले नेपालगञ्ज पौडी क्लबसँगको समन्वयमा यो प्रतियोगिता आयोजना गर्न लागेको हो। आयोजकका अनुसार यसले जिल्लाका पौडी खेलाडीहरूको प्रतिभा उजागर गर्न मद्दत गर्ने विश्वास गरिएको छ।

पत्रकार सम्मेलनमा शिखा एकेडेमीका अध्यक्ष गोपाल प्रसाद अधिकारी, सिइओ डा. राजकुमार सुवेदी, प्रिन्सिपल ई. राजीव सुवेदी लगायतले विद्यालयको शैक्षिक गतिविधिसँगै अतिरिक्त क्रियाकलापमा पनि जोड दिइरहेको जानकारी गराएका थिए। कार्यक्रममा किड्स किंगडमका अध्यक्ष माधव प्रसाद अधिकारी, स्विमिङ संघ लुम्बिनी उपाध्यक्ष संजय थापा तथा विद्यालय सञ्चालक सदस्यहरूको उपस्थिति थियो।