२१, चैत्र २०८१
बाँके ।नेपाल कम्युनिस्ट पार्टी (नेकपा) एकीकृत समाजवादीका पोलिटब्युरो सदस्य अशोक कोइरालाको निधनको १०औँ दिनमा नेकपा (माओवादी केन्द्र)का अध्यक्ष एवं पूर्वप्रधानमन्त्री पुष्पकमल दाहाल ‘प्रचण्ड’ले उहाँको निजी निवास कोहलपुर नगरपालिका–११, दश बिगाहामा पुगेर श्रद्धाञ्जली अर्पण गर्नुभएको छ।

सो अवसरमा माओवादी केन्द्रका उपाध्यक्ष पम्फा भुसाल, लुम्बिनी प्रदेशका पूर्वमुख्यमन्त्री एवं माओवादी केन्द्रका नेता कुलप्रसाद केसी, नेता नरेन्द्र पाण्डे, गोपालप्रसाद अधिकारी, गंगा दाहाल, प्रदेशसभा सदस्य कृष्ण केसी, खजुरा गाउँपालिका अध्यक्ष डम्बर बहादुर बिक लगायत माओवादी केन्द्रका नेता तथा कार्यकर्ताहरूले पनि कोइरालाको निजी निवासमा पुगेर श्रद्धाञ्जली व्यक्त गर्नुभयो।

माओवादी केन्द्रले कोइरालाको अप्रत्याशित निधनले कम्युनिस्ट आन्दोलन तथा उहाँको परिवारलाई ठूलो क्षति पुगेको उल्लेख गर्दै उहाँप्रति श्रद्धाञ्जली व्यक्त गरेको छ।